Në Qendrën Korrektuese Dubravë ka përfunduar me sukses trajnimi profesional për katër zanate: Murator, Zdrukthëtar, Instalues të ujit dhe kanalizimit, si dhe Metalpunues.
Në kuadër të këtij programi, 22 të burgosur morën pjesë në trajnim dhe u certifikuan për aftësitë e fituara, duke iu ofruar atyre mundësi më të mira për riintegrim në shoqëri pas përfundimit të dënimit.
Në ceremoninë e ndarjes së certifikatave ishin të pranishëm Drejtori i Qendrës Korrektuese Dubravë, z. Sami Gashi, Drejtori i Qendrës së Aftësimit Profesional Pejë, z. Edison Bërdyna, koordinatorja për cilësi në Qendrën e Aftësimit Profesional Pejë, znj. Erodita Tatlixhi, si dhe trajnerët nga Qendra Korrektuese Dubravë.
Ky trajnim është pjesë e angazhimit të institucioneve për të ndihmuar të burgosurit në zhvillimin e aftësive profesionale dhe përgatitjen e tyre për tregun e punës pas lirimit.
