Në Qendrën Edukative Korrektuese në Lipjan u shënua Dita Botërore e Vetëdijësimit mbi Autizmin, një ngjarje që synon të rrisë ndërgjegjësimin dhe mbështetjen për personat me autizëm.
Me këtë rast, të miturit e kësaj qendre prezantuan punimet e tyre të realizuara në kabinetin e rrobaqepësisë, të cilat do të dhurohen për fëmijët me autizëm. Aktiviteti u zhvillua nën moton “Edhe NE mendojmë për ju”, duke reflektuar përkushtimin dhe solidaritetin e tyre ndaj fëmijëve autikë.
Ky organizim është pjesë e përpjekjeve të vazhdueshme të Qendrës Edukative Korrektuese për të promovuar vlera humane dhe për të inkurajuar të miturit që të angazhohen në aktivitete me ndikim pozitiv në shoqëri.
