01.04.2025

Qendrën Edukuese Korrektuese për të Mitur e vizitoi një delegacion i UNICEF-it, të cilët panë nga afër zhvillimin e programeve edukative dhe risocializuese që ofrohen për të miturit në këtë institucion.

Gjatë vizitës, përfaqësuesit e UNICEF-it patën mundësinë të bisedojnë me të rinjtë e qendrës, të cilët ndanë përvojat e tyre gjatë qëndrimit aty. Ata folën për mësimet që kanë nxjerrë, aftësitë e reja që kanë fituar dhe ndikimin e programeve në zhvillimin e tyre personal dhe profesional. Një theks i veçantë iu vu rëndësisë së këtyre aktiviteteve për rehabilitimin dhe riintegrimin e tyre në shoqëri pas lirimit.

Gjithashtu, të miturit ndanë planet e tyre për të ardhmen, duke treguar interes për vijimin e shkollimit, ndjekjen e trajnimeve profesionale dhe mundësitë e punësimit. Përfaqësuesit e UNICEF-it vlerësuan përkushtimin e Shërbimit Korrektues të Kosovës për të krijuar kushte sa më të mira për zhvillimin e të miturve dhe shprehën gatishmërinë për të vazhduar mbështetjen në këtë drejtim.

Shërbimi Korrektues i Kosovës mbetet i përkushtuar në ofrimin e një mjedisi të sigurt dhe edukativ për të miturit, duke u siguruar atyre mundësi për një të ardhme më të mirë.